நம்பினார் கெடுவதில்லை!

ஒருவரை நம்பியதனால் நான் அடைந்த ஏமாற்றத்தைப் பாடுபட்டு ஏற்றுக்கொண்டு அதனைக் கடந்து செல்லும் ஒவ்வொரு முறையும் அடுத்ததாக ஒருவரை நம்பும் வல்லமையை நான் கொஞ்சமேனும் இழக்கத் தான் செய்கிறேன். எனினும், "தான் நம்பப்படவில்லையே" என்ற ஆதங்கம் நாணயமுள்ள எந்த ஒருவருக்கும் என்னால் ஏற்பட்டுவிடக் கூடாது என்ற அக்கறையால் நான் மீண்டும் முன்முடிவற்று நம்பத் தொடங்குகிறேன் - நான் நம்ப விரும்புபவர்களை; ஏமாறுவதற்கு முன்னரே விழித்துக் கொள்ளும் பாடத்தைக் கற்றுத் தெளிந்து விட்டேன் என்ற என் நம்பிக்கையை மட்டும் துணையாகக் கொண்டு!

- ஜ. விஜய் வெங்கட்ராமன் 

(25 ஜனவரி 2025)

பிச்சை

பொருள் வேண்டித் தன்னை நோக்கி நடந்து வரும் பிச்சைக்காரரிடம் கண்களாலேயே அருள் பிச்சை கேட்டார் தன் சட்டைப்பையில் சில்லறை இல்லை என்பதை முன்பே அறிந்திருந்த செல்வந்தர்!

நண்பன் கண்ணதாசனுக்குப் பிறந்தநாள் வாழ்த்து!

மருத்துவம் நம்மைச் சந்திக்க வைத்தாலும் 

இசையே நம்மை இணைத்து வைத்தது! 

உன்னைப்போலத் தான் நானென்று நீயும் 

என்னைப்போலத் தான் நீயென்று நானும் 

உணர்ந்த அத்தருணத்தில் தொடங்கிய நட்பால் 

எவ்வளவு இசையை பருகியிருப்போம் ஒன்றாக!

எத்தனை மேடைகளில் இசைத்திருப்போம் நன்றாக!

இசைஞானியின் பெருமையினை இணைந்து நாம்உணர 

இசைந்த நம்மனங்கள் வளர்த்த அன்பினால் 

உன்வாழ்வில் நானும் என்வாழ்வில் நீயும் 

இரண்டரக் கலந்திடவே ஒன்றானது நம்வாழ்வு! 

உன்னைநான் வாழ்த்துவதும் என்னைநீ வாழ்த்துவதும் 

வார்த்தைகளாலா? அல்ல! ஒன்றான மனத்தால்!

"ஹே ராஜா! ஒன்றானோம் இன்று! 

இனி நாம் தானே ரெண்டல்ல ஒன்று!"

என்று நமக்குப் பொருத்தமாகப் 

பாடல்தந்து 

நட்பே வாழ்த்திய பெருமையுடன் சொல்வேன்:

Happy Birthday, Partner! Wishing you many more happy returns of the day!

அன்பு பாரமா?

சுமக்க முடியாத பாரமாக மாறிவிடுவதில்
தன்னிகரற்றுத் திகழ்கிறது "அன்பு"!

சில நேரங்களில்
அது மற்றவர்கள் நம் மீது வைத்திருக்கும் அன்பாக இருந்தாலும்,
பல நேரங்களில்
அது நாம் மற்றவர்கள் மீது வைத்திருக்கும்
அன்பாகவே இருக்கிறது!

இசையால் மலர்ந்ததே மொழி!

நவம்பர் 6, 1980 அன்று திரைக்கு வந்த இரண்டு படங்கள்:

1) நிழல்கள் - வைரமுத்து எழுதிய முதல் பாடல் இடம்பெற்ற திரைப்படம்.

2) மூடுபனி - இளையராஜா இசையமைத்த 100வது திரைப்படம். 

1976ல் அறிமுகமாகி 4 ஆண்டுகளுக்குள் 100 படங்களுக்கு இசையமைத்து அவற்றில் குறைந்தபட்சம் 100 சூப்பர்ஹிட் பாடல்களைத் தந்து உலகிலேயே யாரும் என்றும் நினைத்துக் கூடப் பார்க்க முடியாத சாதனையை அன்றே செய்தவர் இளையராஜா என்பது வரலாற்று உண்மை.

வைரமுத்துவால் இளையராஜா ஆதாயம் அடைந்தார் என்போரின் பேச்சைக் கேட்பதற்கு முன்பு இளைய தலைமுறையினர் தெரிந்து கொள்ள வேண்டிய செய்தி இது!

மகிழ்ச்சியும் மலர்ச்சியும்

"அவள் முகம் மலர

அவன் மனம் மகிழும்!

அவன் மனம் மகிழ

அவள் முகம் மலரும்:

இருமுகமும் ஒருமுகமென

இல்வாழ்வில் ஒன்றானதால்!"

இன்று எங்களது திருமண நாளுக்காக வாழ்த்திக் கொண்டிருக்கும் நலம்விரும்பிகளுக்கு நன்றிகளுடன் அடுத்த தலைமுறை இணைகளுக்கு எங்களது அனுபவச் செய்தி இது 😊

- Vijay Venkatraman Janarthanan & Harrini Kumarakrishnan

இன்று சுதந்திர தினம் தான் - விடுதலை நாள் அல்ல!

இன்று சுதந்திர தினம் தான் - விடுதலை நாள் அல்ல!

ஆம்! 

தான் இனி அந்நியருக்கு அடிமையாக இல்லையென்ற இறுமாப்பில்

தான் அடிமையாக நடத்துவோரின் உரிமையைச் சட்டை செய்யாது

தான் உருவாக்கும் கற்பிதங்களால் சமத்துவம் மலராது தடுத்தபின்

தான் சுதந்திரம் அடைந்த இந்நாளை

அனைவரும் கொண்டாடுமாறு

தான் கட்டளையிட்டுக் கேட்பதால்

எல்லோரும் மதித்து நடந்திடத்

தான் இந்நாளென்று எண்ணுவோர் அறிவரோ விடுதலையின் பொருளை?

சுதந்திரம் தனி மனிதனுக்கானது! 

இயல்பான தன்னலம் நிறைந்தது! 

தானும் தன்னைச் சார்ந்தோரும் 

தன்னைப் போன்றோரும் எவ்வித 

இடையூறும் இன்றி வாழ்வதே 

சுதந்திரமென எண்ணும் இவர்கள்

தான் அடிமைத்தளையில் இருந்து 

மீள்வது மட்டுமின்றித் தன்னால் 

வேறு யாரும் அடிமைப்படாமல் 

அனைவரும் சமம் என்றெண்ணும் 

உலகை உருவாக்கப் போராடுவதே 

விடுதலையென என்று அறிவரோ?

எனினும், நம்பிக்கையுடன் கொண்டாடுவோம்! சீக்கிரம் நல்லவை நிகழுமென்று!

அனைவருக்கும் இனிய சுதந்திர தின வாழ்த்துகள்!

- ஜ. விஜய் வெங்கட்ராமன்

  15 ஆகஸ்ட் 2023