மகிழ்ச்சியும் மலர்ச்சியும்

"அவள் முகம் மலர

அவன் மனம் மகிழும்!

அவன் மனம் மகிழ

அவள் முகம் மலரும்:

இருமுகமும் ஒருமுகமென

இல்வாழ்வில் ஒன்றானதால்!"

இன்று எங்களது திருமண நாளுக்காக வாழ்த்திக் கொண்டிருக்கும் நலம்விரும்பிகளுக்கு நன்றிகளுடன் அடுத்த தலைமுறை இணைகளுக்கு எங்களது அனுபவச் செய்தி இது 😊

- Vijay Venkatraman Janarthanan & Harrini Kumarakrishnan

கடவுளைச் சோதித்த வரம்!

நின் தவம்தனை மெச்சினோம் - 

வரமெது வேண்டும் என்று

தன் முகமெலாம் பெருமிதமது  

வழிந்திடக் கேட்டான் அவன்!

உன் படைப்பாம் இவ்வுலகில் 

வாழ்ந்தும் நான் மகிழ்ந்திட

என் இயல்பாம் இரக்கமதை 

வலிய இழக்க வேண்டும்!

ஆதலால் - வரமாய் நீயீந்த 

அன்புடை இதயமாம் இதை

ஈடாய் எடுத்துக் கொண்டு

இன்பமடைய விடு என்றென்!

படைத்தவன் மெல்லத் தலைகுனிந்தான் - 

விடையற்ற தன் நிலையுணர்ந்து!

- ஜ. விஜய் வெங்கட்ராமன்

09-12-2017

திரையும் திறையும்

பனித்திரை சூழும் பண்புடை நாட்டுக்குப் 

பணித்திறை விலகாப் பற்றுடன் சென்றிட 

மனத்திரை திறந்து மகிழ்வோர் வாழ்த்தும்  

மணத்திறை போதுமே மதியுளோர் வெல்ல!