நன்றியுள்ள நாய்க்குட்டி

இன்னா எண்ணுதலை இழிந்ததென்று உணர்த்தாது 
இந்நாளில் இவையெலாம் இயல்பென உரைக்கும் 
என் கயமையைக் கேட்டுப்பழகியபடியே வளர்ந்திடும் 
என் மனசாட்சியும் நன்றியுள்ளதோர் நாய்க்குட்டியே!

திங்கள்

திங்களுக்கோர் எண்ணப்பதிவை எழுதநினைத்துத் தொடங்கினேன்
திங்களன்று உவகையுடன் பள்ளிசெல்லும் மாணவனைப்போல்!
திங்களாய் மனவானின் ஓரத்தில் வளர்ந்துதேய்ந்தேயிருந்தாலும்
திங்களிறுதியில்தான் முழுநிலவுநாளோ என் கவிநிலவுக்கு?

வேண்டுதல்

வராததை வருமென்று எண்ணியெண்ணி நிதம்நாடி

வந்ததை எல்லாம் விட்டுவிட்டுத் தேடியோடியதில்

வராத துன்பமெல்லாம் வந்தபின்னும் - அவ்வராததை

வந்திட வேண்டுதல் முறையோ?

எண்ணம்

எண்ணும் எண்ணத்தை எண்ணி எண்ணியே

எண்ணம் போனதால் எண்ண வேண்டியவற்றை

எண்ணத் தவறிவிடும் எண்ணச்சூழல் ஏற்படின்

எண்ணமே தவறோ? எண்ணுபவர் தவறோ?

துன்பமும் பெருந்துன்பமும்!

ஏதாவதொரு வழிபிறக்காதா என்று தவித்துத் தேடும்போது
எதுவும் கிடைக்காமல் போவது துன்பமெனில்
ஏராளமாய் அடைந்த ஒன்றில் நிலைத்திட நினைக்கும்போது
எண்ணியதெல்லாம் கிடைக்கப் பெறுவது பெருந்துன்பமன்றோ?!