அன்பின் நட்பும் நட்பின் அன்பும்

நட்பு எனக்கு அன்பு செய்ததால் அன்புக்கு நட்பானேன்;

அன்புடன் பழகப் பழகவே பல்கிப் பெருகியது நட்பு!

அன்பின் நண்பனென்றும் நட்பின் அன்பனென்றும்

நட்பும் அன்பும் எனைக்காத்துக் கொண்டாட,

வியந்து நின்றது வினை - என்னை 

வீழ்த்தும் வழி எதுவென்று அறியாது!

துன்பமெனும் அம்பை இறுமாப்புடன் எய்தது வினை; 

ஆறுதலால் உயிர்த்தெழச் செய்தது நட்பின் அன்பு!

துரோகம் கொண்டு நிலைகுலைக்க எண்ணியது வினை;

ஆதரவாய்க் கயமையை வென்றது அன்பின் நட்பு!

தாக்கவோர் ஆயுதமின்றித் திகைத்த வினை

தயங்கியே ஏற்றது தான் தோற்றதை!

திரையும் திறையும்

பனித்திரை சூழும் பண்புடை நாட்டுக்குப் 

பணித்திறை விலகாப் பற்றுடன் சென்றிட 

மனத்திரை திறந்து மகிழ்வோர் வாழ்த்தும்  

மணத்திறை போதுமே மதியுளோர் வெல்ல!

திறனாய்வு

தன்னை உணராது தன்திறன் அறியாது 

தன்னைத் தானே தாழ்த்தி உயர்த்தும் 

தன்மையால் நன்மை நேராதென்று உணரும் 

தன்மையே தாழ்வற்ற உயர்வான திறன்!

இறந்தும் இரப்பவள் யார்?

இரக்க குணம்தனை இருக்கையில் 

இறக்கச் செய்து வாழ்பவர்கள் இருக்க, 

இறந்தும் தன் மக்களுக்கு 

இரந்து வாழ வைப்பவள் தாய்!

- கைபேசி கொண்டு தமிழில் நான் எழுதும் முதல் பதிவு!

நன்றியுள்ள நாய்க்குட்டி

இன்னா எண்ணுதலை இழிந்ததென்று உணர்த்தாது 
இந்நாளில் இவையெலாம் இயல்பென உரைக்கும் 
என் கயமையைக் கேட்டுப்பழகியபடியே வளர்ந்திடும் 
என் மனசாட்சியும் நன்றியுள்ளதோர் நாய்க்குட்டியே!

அரிதிலும் அரிது கேள்!

எளிதிலும் எளிது - யாரையும் மன்னிக்கும் மனது இல்லாமலிருப்பது; 

எளிது - தனக்குப் பிடித்தவர்களை மட்டுமே மன்னிக்க நினைப்பது;

எளிதிலும் அரிது - தெரியாமல் மோதிச்சென்ற தெரியாதவரை மன்னிப்பது;

அரிதிலும் எளிது - தவறிழைத்த நண்பர்களையும் மன்னிக்காமல் தண்டிப்பது; 

அரிது - கொடிய பகைவனையும் பெருந்துரோகியையும் மன்னித்து அருள்வது; 

அரிதிலும் அரிது - தன்தவறுகளை ஒப்புக்கொண்டு மன்னிக்க வேண்டுவது!

தீர்ப்பு

தீர்ந்திடாத இன்னலும் தீர்ந்திட வேண்டித்
தீராததோர் இறையைத் தீர்வுக்கென நாடித்
தீர்க்கமாய் நம்பியும் தீரவில்லை இன்னல் -
தீர்ப்பதுதன் கையிலென்று உணராதோனுக்கு!