யாராக இருப்பது நான்?

"எவருக்கும் தீங்கு இழைக்க 

நினைக்கும் அளவுக்குக் கூட 

நீ தீயவனாக இருந்திடாதே!

உனக்கு இழைக்கப்படும் தீங்கினை 

உணர இயலாத அளவுக்கு 

நல்லவனாகவும் இருந்திடாதே!"

- 2023ம் ஆண்டுக்கான என் சிந்தனை :-)

தாயருள் என்ன செய்யும்?

சாலச்சிறந்தோர் நடுவே சிறியோன் நானும் 

காலத்தே நின்றிடவோர் பேரிடம் தந்தது 

உழைப்புக்கும் திறனுக்கும் பருவம் தவறா 

மழையெனப் பலன்தந்த என் தாயருளே!

Immensely privileged to be representing India on the Editorial Board of Global Forum, the official magazine of the Drug Information Association (DIA)!

கோவைக்கு ஒரு வாழ்த்து!

கோவையால் வாழ்ந்தோர் பலர் கோவையாய்க் 

கோவையைக் கைவிட்ட போதும் கோவாய்க் 

காக்கும் கோவை - பாவையரை மட்டுமின்றிப் 

பன்மொழி பேசும் அத்தனைக் கோவையரையும்!

பெண்களுக்குப் பாதுகாப்பான இந்திய நகரங்களுள் முதன்மையானதாகக் கோவை தேர்வுசெய்யப்பட்டதை முன்னிட்டு 11 ஜனவரி 2017 அன்று நான் எழுதியது இது.

செய்தி ஆதாரங்கள்:

1. https://timesofindia.indiatimes.com/india/women-50-times-more-exposed-to-gender-crime-in-jodhpur-than-in-coimbatore/articleshow/56415541.cms 

2. https://www.vikatan.com/government-and-politics/77479-coimbatore-is-the-safest-city-for-women-in-india 

போதைக்கு அடிமை நான்!

பன்னாட்டு மாநாடு எந்நாட்டில் நிகழ்ந்திடினும் 

தோழமையென வழங்கும் மதிநிறை மாலையிலே 

இம்மதுவோ அம்மதுவோ எம்மது தந்திடவென 

வினவிடும் அன்பரிடம் - மதுவேதும் பழகாதவன் 

நானென்றுரைக்க அவர் புருவங்கள் மேலெழும்பும் 

செயலெனக்குத்தரும் போதைக்கு அடிமை நான்!

தான்

தானாய் வரும் நன்மைதனைக் கடந்துத் 

தன்னால் நிகழும் நன்மை யாதென நினைந்துத் 

தானாய் வரும் தீமைதனைத் தவிர்த்துத் 

தன்னால் தீமை நிகழாதென மாந்தர்குலம் சூளுரைக்கத் 

தானாய்த் தோன்றிய இப்பாடலால் வேண்டினேன்
தன்னால் பூத்த அழகுப் புத்தாண்டு மலரை!

அன்பின் நட்பும் நட்பின் அன்பும்

நட்பு எனக்கு அன்பு செய்ததால் அன்புக்கு நட்பானேன்;

அன்புடன் பழகப் பழகவே பல்கிப் பெருகியது நட்பு!

அன்பின் நண்பனென்றும் நட்பின் அன்பனென்றும்

நட்பும் அன்பும் எனைக்காத்துக் கொண்டாட,

வியந்து நின்றது வினை - என்னை 

வீழ்த்தும் வழி எதுவென்று அறியாது!

துன்பமெனும் அம்பை இறுமாப்புடன் எய்தது வினை; 

ஆறுதலால் உயிர்த்தெழச் செய்தது நட்பின் அன்பு!

துரோகம் கொண்டு நிலைகுலைக்க எண்ணியது வினை;

ஆதரவாய்க் கயமையை வென்றது அன்பின் நட்பு!

தாக்கவோர் ஆயுதமின்றித் திகைத்த வினை

தயங்கியே ஏற்றது தான் தோற்றதை!

திரையும் திறையும்

பனித்திரை சூழும் பண்புடை நாட்டுக்குப் 

பணித்திறை விலகாப் பற்றுடன் சென்றிட 

மனத்திரை திறந்து மகிழ்வோர் வாழ்த்தும்  

மணத்திறை போதுமே மதியுளோர் வெல்ல!